.:: Eenadu Pen Counter ::.

ఇదెందుకంటే...

వార్తా పత్రికల్లో ముద్రా రాక్షసాలు సహజం. పాత్రికేయ విలువల్ని మంటగలిపే రాక్షస ముద్రణలు నిషిద్ధం. 'వై.ఎస్.వలన, వై.ఎస్.చేత, వై.ఎస్.కొరకు'గా వై.ఎస్.తనయుడి సారథ్యంలో పుట్టి, ఫ్యాక్షనిజ నైజానికి సాక్షీభూతంగా నిలుస్తున్న పత్రికలో- 'ఏది నిజం' అంటూ పెడుతున్న కుటిల రాజకీయ పెడబొబ్బలు సచ్ఛీల పాత్రికేయ విలువలకు సిలువ వేసే దుస్తంత్రమే. వక్రమా వక్రమా ఎందుకు పుట్టావంటే సక్రమంగా ఉన్నవాళ్లను వెక్కిరించడానికి అన్నదట. ఆ కళలో అవక్ర విక్రమంగా చెలరేగిపోతూ- వై.ఎస్.సర్కారు దగాకోరు ధోరణుల్ని ప్రజలపక్షాన నిలదీస్తున్నందుకు 'ఈనాడు'పై అవాకులూ చెవాకులతో సాక్షి ఏది నిజం అంటూ దురావేశపడిపోతోంది. ఎప్పటికప్పుడు గాలి రాతలు, అసత్యాల ఎత్తిపోతలతో మాటల్లో దట్టించిన విషం సాక్షిగా, విషయాన్ని పక్కదారి పట్టిస్తోంది. 'ఈనాడు'పై గల ఆక్రోశాన్ని అక్షరాల్లో పొదిగి స్వోత్కర్ష, పరనింద లతో పేరాలు నింపి, కడుపుమంట తీర్చుకోవడం కాదు పాత్రికేయమంటే! పత్రికలో కాలాలకొద్దీ 'ఈనాడు'పై కాలకూటం చిమ్మడమే సాక్షి ఏకైక అజెండా. వై.ఎస్.సర్కారు తప్పొప్పుల్ని ఎత్తిచూపుతూ ప్రజా ప్రయోజనాల పరిరక్షణే లక్ష్యంగా అసిధారావ్రతం చేస్తున్నందుకే- 'ఈనాడు' విశ్వసనీయతను దెబ్బతీయాలన్న దురుద్దేశంతో సాగుతోంది దమనకాండ! 'ఏటి వంకలు ఎవరు తీరుస్తారు, కుక్క తోకను ఎవరు చక్క చేస్తారు' అన్న వివేచనతో 'ఈనాడు' ఎంతో కాలం సంయమనం పాటించింది. సాక్షి కుటిల సవాళ్లకు ఎప్పటికప్పుడు సరైన జవాబు ఇవ్వగలిగి ఉండీ- 'ఈనాడు' పాఠకజన కోటి ఆశించేది అది కాదని తెలుసు కాబట్టే సాక్షి ఆగడాలను చాలాకాలం చూసీ చూడనట్టు ఊరుకొంది. అదే అలుసుగా రెచ్చిపోతున్న వాళ్లకు నిజం నిప్పులాంటిదని, దాన్ని గుప్పిట పడితే చేయి కాలుతుందని ఇక తెలియజెప్పాలన్నదే 'ఈనాడు' సంకల్పం. సాక్షి కౌటిల్యాన్ని 'అక్షరాలా' ఖండించకపోతే ఏ కొద్దిమందైనా ఆ కథనాలే నిజమని నమ్మే ప్రమాదం ఉందని తెలిసికూడా- పాఠకదేవుళ్లకు విశిష్ట వార్తా నైవేద్యం అందించే 'ఈనాడు' పుటల్ని ఆ ఖండన మండనలకు కేటాయించరాదన్నదే మా అభిమతం. కాబట్టే- ఏది నిజమంటూ సాక్షి కడుతున్న అబద్ధాల పేక మేడల్ని పడగొట్టి, వాస్తవాల్ని విజ్ఞులైన ప్రజలముందు ఆవిష్కరించేందుకు 'ఈనాడు' ఇంటర్నెట్‌లో 'పెన్‌కౌంటర్' ప్రారంభిస్తోంది. దశాబ్దాలుగా 'ఈనాడు' పాటిస్తున్న అత్యున్నత పాత్రికేయ ప్రమాణాలకే ఇందులోనూ పెద్దపీట. తేడా అల్లా- సాక్షి చెప్పేది ఏదీ నిజం కాదని రుజువు చేసేలా మాటకు మాట, పొల్లుమాటల పోలిగాళ్లపై గురిచూసి పేల్చే వాస్తవాల తూటా!